හලාවත මූලස්ථාන පොලිසියේ 8 දෙනෙකුගේ වැඩ තහනම්


73 Views

වෙන්නප්පුව ප්‍රදේශයේ හෝටලයක සූදු ක්‍රීඩාවේ නිරතව සිටියදී අත්අඩංගුවට ගත් පිරිසක් අයථා ලෙස මුදා හැරීම සඳහා කටයුතු කිරීමේ චෝදනාවට හලාවත මූලස්ථාන පොලීසියට අනුයුක්ත කොට්ඨාශ දූෂණ මර්දන අංශයේ ස්ථානාධිපතිවරයා ඇතුළු නිලධාරීන් 8 දෙනෙකුගේ වැඩ තහනම් කර තිබෙනවා.

නාත්තණ්ඩිය සහකාර පොලිස් අධිකාරී කාර්යාලයට ලද තොරතුරක් මත සිදුකළ විමර්ශනයක් අනුව එම වැඩ තහනම් කිරීම සිදුකළ බවයි පොලිස් මාධ්‍ය ප්‍රකාශක කාර්යාලය සඳහන් කළේ.

මේ මස 6 වන දා වෙන්නප්පුව ප්‍රදේශයේ හෝටලයක මුදල් ඔට්ටුවට සූදු ක්‍රීඩා කරමින් සිටි සැකකරුවන් 20කට වැඩි ප්‍රමාණයක් අතරින් 9 දෙනෙකු පමණක් අත්අඩංගුවට ගෙන සෙසු පිරිස මුදා හැර ඇති බවට අදාළ පොලිස් නිලධාරීන්ට එරෙහිව චෝදනා එල්ල වී තිබෙනවා.

මෙලෙස වැඩ තහනමට ලක්වූයේ හලාවත මූලස්ථාන පොලීසියට අනුයුක්තව කොට්ඨාශ දූෂණ මර්දන අංශයේ ස්ථානාධිපති ලෙස රාජකාරී සිදුකළ උප පොලිස් පරීක්ෂකවරයෙක්, පොලිස් සැරයන්වරයෙක්, පොලිස් කොස්තාපල්වරුන් 5 දෙනෙක් සහ පොලිස් කොස්තාපල් රියදුරෙක්.

Make a Comment
Make a Comment

  Related News