ඒ ගමන නොගිහින් සිටියා නම් මමත් එදා බෝම්බයෙන් ඉවරයි


1,221 Views

‘සමුද්‍ර‘දේවී’ වේදිකා නාට්‍ය‘යේ පෘතුගීසිකාරයෙකුගේ චරිතය රඟපාමින් ‘ගෝවේ ගෑණු පරාදයි රූපේ මහද පිනා යයි’ යන ගීතය ගායනා කරන සඳුන් විජේසිරි නම් ජ්‍යෙෂ්ඨ රංගන ශිල්පියා කළ අපූරු රංගනය නාට්‍ය‘ලෝලීන්ගේ හදවත්වල තැන්පත්ව ඇතුවාට සැකයක් නැත. මෙවර ‘ඒ කාලේ මං’ මාතෘකාව යටතේ ඔබ හමුවට රැගෙන එන්නේ ඔහුය. අපි දැන් විමසා දැනගනිමු සඳුන් විජේසිරි රංගන ශිල්පියාගේ කලාදිවියේ ඒ කාලේ තොරතුරුවලින් බිඳක්.

ඔහුගේ උප්පැන්නේ සඳහන් සම්පූර්ණ නම සඳහන් කරන්න?

වීරතුංගගේ සඳුන් විජේසිරි

උපන් ගම?

කඩුගන්නාව.

දෙමව්පියන් ඇතුළු පවුලේ විස්තර සඳහන් කළොත්?

තාත්තා පෞද්ගලික ආයතනයක සේවය කළ කැමරා ශිල්පියෙක්. අම්මා ගෘහණියක්. පවුලේ සාමාජික සංඛ්‍යාව 06 දෙනෙක්. අයියලා දෙන්නෙක් මහනුවර පිහිටි කොලීජියේ ඉගෙන ගත්තා.

ඔබ ඉගෙන ගත්තේ?

මං පුංචි කාලෙදිම තාත්තා කිරුළපන බලපොකුණ පාරේ නිවසක් අරගෙන පදිංචියට ආපු නිසා මමයි, අක්කයි නුගේගොඩ අනුලා විද්‍යාලයට ඇතුළත් වුණා. ඊට පසුව වැල්ලවත්තේ ශ්‍රී ලංකාධාර බාලිකා විද්‍යාලයට ඇතුළුවෙලා පහ වසර දක්වා ඉගෙන ගත්තා.

ඊට පස්සේ?

හය වැනි වසරේ සිට දෙහිවල මධ්‍ය මහා විද්‍යාලයට ඇතුළත් වෙලා උසස්පෙළ දක්වා ඉගෙන ගත්තා.

එසේ ඉගෙන ගත් කාලය තුළදී ඔබේ ජීවිතයේ යම් පරිවර්තනයක් සිදුවුණාද?

ඇත්තටම ඔව්. හිටපු විභාග කොමසාරිස්වරයෙකු වූ කනකරත්න ගුණතුංග මහතා අපේ පාසලට පැමිණ නාට්‍ය දෙකක් නිෂ්පාදනය කිරීමත් සමගම තමයි ඒ පරිවර්තනය සිදුවුණේ.

විස්තර කරන්න බලන්න?

එතුමා නිෂ්පාදනය කළ ‘අශෝක මාලා’ නාට්‍ය‘යේ එන තිස්ස කුමාරයාගේ චරිතයටත්, ‘කුඩු කෑ විත්තිය’ නාට්‍ය‘යේ ගැමියෙකුගේ චරිතයටත් මාව තෝරාගත්තා. තිස්ස කුමාරයාගේ චරිතය මම රඟපෑවේ මට පහළ පන්තිය සිටි අද ප්‍රවීන නිළියක්ව සිටින සුවිනීතා වීරසිංහ සමගයි. මගේ පන්තියේ සිටි අද ප්‍රවීණ ගීත රචකයෙක් හා රංගන ශිල්පියෙක් වන ලූෂන් බුලත්සිංහල ‘අශෝකමාලා’ නාට්‍ය‘යේ එන සාලිය කුමාරයාගේ චරිතයට තෝරා ගත්තා. ගායන ශිල්පී රොම්ලස් පෙරේරාත්, ජුලියට් නම් ශිෂ්‍යාව මට පහළ පන්තියක හිටියා මතකයි. ශිෂ්‍යාව මා සමග රඟපෑව, දැන් ඇය දකින්නට නැහැ.

කොහොමද ප්‍රතිචාර?

හරි ඉහළයි. අනාගත කලා ලොව සරසන ප්‍රවීණයෝ බවට පත්වෙන ලකුණු තිබෙනවා යැයි නාට්‍ය දෙක නැරැඹූ බුද්ධිමතුන් මත පළ කර තිබුණා.

ඊට පස්සේ?

මම උසස්පෙළ සමත් වෙලා පේරාදෙණිය විශ්වවිද්‍යාලයට තේරුණා.

ඉතින් ගියාද?

නැහැ. මම දෙමව්පියන්ට බරක් වෙන්න කැමති වුණේ නැහැ. අම්මගෙයි, තාත්තාගෙයි ඇස්වල කදුළු පිරුණා. ඒ වෙලාවේ මං පොරොන්දු වුණා රැකියාවක් කරන අතර උපාධිය කරන්නම් කියලා.

ඉතින් ඊළඟට මොකද කළේ?

මම මහජන බැංකුවේ පුහුණුවීමට ඇතුළු වුණා. ඒ 1962 වසරේදී. ඒ පුහුණුවීමේ කාලය අවසන් වුණාම මට පුළුවන් වුණා ශ්‍රී ලංකා මහ බැංකුවේ සේවයට සම්බන්ධ වෙන්න.

එතකොට අර උපාධිය?

ඔව්. ඒ වෙනකොට ව්‍යාපාර හා මූල්‍යකරණය පිළිබඳ ඩිප්ලෝමාව, විශ්වවිද්‍යාලයෙන් බාහිර කලා උපාධිය සහ පුහුණු බැංකුකරුවෙක් හැටියට සහතික ලබාගන්න මට හැකියාව ලැබුණා.

එතකොට කලා ලොව ගමන?

කලා ලොව ජයගන්න මම ජී.ඩී.එල්. පෙරේරා සූරින්ගේ ‘කලාපෙළ’ සංවිධානයේ සාමාජිකත්වය ලබාගෙන නාට්‍යකරණ පාඨමාලාව හැදෑරුවා.

ඔය හැදෑරීමෙන් පසුව ඔබට රඟපෑම සඳහා ආරාධනා ලැබූ ප්‍රථම නාට්‍ය මොකක්ද?

ලූෂන් බුලත්සිංහලගේ ‘නොනිමෙන ගිනි’ වේදිකා නාට්‍යය. මේ නාට්‍ය‘යේ අනුලා කරුණාතිලකත් රඟපෑවා. රාජ්‍ය නාට්‍ය උළෙලටත් ඉදිරිපත් කළා මේ නාට්‍ය. ප්‍රථම වරට වේදිකාගත කළේ කොළඹ ලුම්බිණි රඟහලේදී. ඒ තමයි මා පය තැබූ ප්‍රසිද්ධ වේදිකාව. එදා මේ නාට්‍ය බලන්න ආචාර්ය ලෙස්ටර් ජේම්ස් පීරිස් මහතා පැමිණ සිටියා මතකයි.

පස්සේ කාලෙක සුමිත්‍රා පීරිස් අධ්‍යක්ෂණය කළ ‘ගොළු හදවත’ ටෙලි නාට්‍යයට සඳුන් විජේසිරි සම්බන්ධ කරගන්නා හැටියට ලෙස්ටර් මහත්මයා සුමිත්‍රා මහත්මියට අණ කරන්නට  ඇත්තේ එදා මා කළ රඟපෑම ගැන පැහැදුනු නිසා වෙන්න ඇති.

ඔබ ගයන ‘ගෝවේ ගෑනු පරාදයි, රූපේ මහද පිනා යයි’ යන ජනප්‍රිය ගීතය ඇතුළත් ‘සමුද්‍ර‘දේවී’ වේදිකා නාට්‍ය ගැන කෙටියෙන් විස්තරයක් කරන්න බලන්න?

ඩී.වී. සෙනෙවිරත්න ලියූ තිර රචනය ස්ටැන්ලි මාස්ටර් විසින් වෙනස් කිරීමෙන් පස්සේ තමයි ‘සමුද්‍ර‘දේවී’ වේදිකා නාට්‍ය නිෂ්පාදනය කෙරුණේ. ‘ගෝවේ ගෑණු පරාදයි’ ගීතයේ රචනය චන්දි ගුණතිලක මහත්මියගේ. කුවින්ටස් වීරකෝන්, මැණිකේ අත්තනායක ගයන ගීතයකුත් මේ නිර්මාණයට ඇතුළත්. මෙහි සංගීතය ආචාර්ය ෂෙල්ටන් ප්‍රේමරත්නගෙන්, පෘතුගීසිකාරයාගේ ප්‍රථම රංගනය මගේ. මට නිවාඩු ගන්නට නොහැකි වූ දවස්වලට එඩී ජුනියර් රඟපෑවා. මේ ගීතය ගුවන් විදුලි තැටියට ගායනය කළේ එඩී ජූනියර්. නමුත් දැන් රට වටා වාදනය කරන්නේ මා ගැයූ ගීතය ඇතුළත් සී.ඩී. තැටිය.
මේ ගීතයට පෙර පෘතුගීසි වචන කිහිපයක් ඇසෙනවා. ඔබ ඒ වචන උච්චාරණය කරන්න ඉගෙන ගත්තේ කොහොමද?

එවකට කැලණිය විශ්ව විද්‍යාලයේ සිටි ආචාර්ය එම්.එස්. ගුණතිලක මහතා හමු වී ඒ ගැන අවබෝධයක් ලබා ගත්තා. මම රගපෑ ඒ පෘතුගීසිකාරයාගේ චරිතයට පණ දුන්නේ එතුමා බව මා නිහතමානීව සඳහන් කර සිටිනවා.

‘ශ්‍රී වික්‍රම’ නාට්‍ය‘යේ ඔබ ‘නෝර්ත්’ ආණ්ඩුකාරයා සහ ‘බ්‍රවුන්ඩ්‍රික්’ ආණ්ඩුකාරයා ලෙසත් සාර්ථක චරිත නිරූපණයක් කළේ කොහොමද?

‘ප්ලේටෝ’ කියන දර්ශනවාදියා ප්‍රකාශ කර තියෙනවා නාට්‍යකරුවාට දිව්‍යමය බලයක් තිබිය යුතු බව. ඒ බලය ලබා ගන්නට නම් ඔහු හෝ ඇය බුද්ධිමත් විය යුතුමයි. මේ බුද්ධිය ලබා ගන්නට මම නිතර නිතර පොත පත පරිශීලනය කළා.  ඔබ ඉහතින් දැක්වූ සුදු මහත්වරුන්ගේ චරිත කෙසේද කියා පර්යේෂණ මට්ටමින් අධ්‍යාපනයක යෙදුණා. ඒ නිසයි එම බටහිර චරිත ඉතාමත් සාර්ථක අන්දමින් ඉදිරිපත් කරන්න හැකියාව ලැබුණේ. එය කොතරම් සාර්ථකදැයි කිව්වොත් එක්තරා කාලයක් එවැනි චරිතවලටම මාව කොටුවුණා.

හොඳයි. ඔබ මේ වන විට ඔබ වේදිකා නාට්‍ය, ටෙලි නාට්‍ය සහ චිත්‍රපට කොපමණ සංඛ්‍යාවකට දායක වී තිබෙනවාද?

වේදිකා නාට්‍ය 100කට අධිකයි. ටෙලි නාට්‍ය නිර්මාණත් 100කට අධිකයි. චිත්‍රපට සංඛ්‍යාව 35ක් පමණ.

මෙපමණක් නොවෙයි, ඔබ ගුවන්විදුලි නාට්‍ය ශිල්පියෙක් සහ හඬකැවීම් ශිල්පියෙක්. ඒ ගැනත් විස්තරයක් කරන්න බලන්න.

‘ඔෂීන්’, ‘ශාන්ති’,’ මහා නගර්’,’ රාමායනය’ ඇතුළු තවත් නාට්‍ය රැසකට මා හඬ කැවීම් කර තිබෙනවා. ගුවන් විදුලිය නාට්‍ය අතරින් ‘වසුන්දරා’ සහ ‘වීදිය බණ්ඩාර’ නාට්‍ය නම් කළ හැකියි.

ඉතාමත්ම ජනප්‍රියත්වයට පත් මේ ගුවන් විදුලි නාට්‍ය ප්‍රචාරය වෙත අනරතුර ලැබුණු ප්‍රතිචාර කොහොමද?

‘වීදිය බණ්ඩාර’ ගුවන් විදුලි නාට්‍ය‘යේත් මම රඟපෑවේ පෘතුගීසිකාරයෙකුගේ චරිතයක්. ඉතින් එක දවසක් මම කඩේකට ගියා බඩු ටිකක් ගන්න. ඒ වෙලාවේ කඩය ළග මිනිස්සු කට්ටියක් රොක්වෙලා ‘වීදිය බණ්ඩාර’ නාට්‍ය ගුවන් විදුලියෙන් අහනවා. මමත් ඉතින් ගුවන් විදුලියෙන් අහනවා. ඊළඟට ආවේ මා රඟපෑ පෘතුගීසි චරිතය. ඒ චරිතයෙන් මෙන්න මෙහෙම කියැවුණා. “හෝ හෝ ආයිබොවන්ඩ මහ රජතුමා.. ආයිබොවන්ඩ... ඒ වචන ටික කියැවුණා විතරයි. එක වයසක මනුස්සයෙක් ලොකු කේන්තියකින් වගේ නැගිටලා ඔන්න කතා කරනවා. පෘතුගීසි ......... ඒ වෙලාවේ මට ඇහුණේ නෑ වගේ මං හිටියා. ඒ කියන්නේ මගේ චරිතය සාර්ථකයි නේද?

ඔබ සහ ශ්‍රී ලංකා මහ බැංකුව ගැන අපට ටිකක් කතා කරන්න අමතක වුණා. මොනවද ඒ සම්බන්ධ ඔබ සිත තුළ තිබෙන අමතක නොවන සටහන්?

ශ්‍රී ලංකා මහ බැංකුව තුළ රාජකාරි කෙරුණේ වැඩිපුරම ඉංග්‍රීසි භාෂාවෙන්. මධ්‍ය මහා විද්‍යාලයකින් පැමිණි තරුණ මහත්මයෙක් මා ළගට පැමිණ කියා සිටියා ඉංග්‍රීසියෙන් වැඩ කිරීම මහා වදයක් ඒ නිසා සේවය අතහැරලා මම ගමට යනවා කියලා.

මම ඔහුව සනසලා කිව්වා මමත් මධ්‍ය මහා විද්‍යාලයක ඉගෙන ගත් තරුණයෙක්, ඒත් ඉතින් දැන් අපි ඉංග්‍රීසියෙන් වැඩ කරන්න ඕනෑමයි කියලා.

මම එදා ඔහුට පහදා දුන්නා 1956 විප්ලවයෙන් සිංහල භාෂාව රාජ්‍ය භාෂාව කරපු නිසා තමයි අපට මේ වදය විඳින්න සිද්ධ වුනේ කියලා.

අපේ රටේ කොල්ලන්ට කෙල්ලන්ට ඉංග්‍රීසි මාධ්‍ය‘යෙන් අධ්‍යාපනය ලබාදුන්නා නම් එකෙක්වත් කාලකණ්නි වෙන්නේ නැහැ. ඔවුන් අපරාධකාරයෝ වෙන්නෙත් නැහැ කියලා.

ශ්‍රී ලංකා මහ බැංකුවෙන් ඔබ විශ්‍රාම යෑම ගැනත් යමක් සඳහන් කළොත්?

වසර 40ක සේවයෙන් පසුව මම විශ්‍රාම ගත්තා. විශ්‍රාම ගන්නා විට ජ්‍යෙෂ්ඨ සහකාර අධ්‍යක්ෂකවරයෙක් විදියටයි සේවය කරමින් සිටියේ.

ශ්‍රී ලංකා මහ බැංකුවට ත්‍රස්තවාදීන් විසින් බෝම්බ ප්‍රහාරයක් එල්ල කරන විට ඔබ සිටියේ කොහේද?

සුදත් සේනාරත්නගේ ‘සක්විති යාගය’ ටෙලි නාට්‍ය රූපගත කිරීම්වලට මම නුවරඑළියට ගිහින් හිටියා. ඒ ගමන නොගිහින් සිටියා නම් එදා මමත් ඉවරයි.

ඔබට තවදුරටත් ජීවත්වීමේ වාසනාව ගෙනා වාසනාවන්තිය ගැනත් අවසාන වශයෙන් විස්තරයක් කරන්න බලන්න?

ආදරණීය බිරිඳගේ නම ශ්‍රියා ඉලේපෙරුම. ඒ විස්තරයත් ලස්සන කතාවක්. මම ශ්‍රී ලංකාධර බාලිකා විද්‍යාලයේ පහේ පන්තියේ ඉගෙන ගන්නා තෙක්ම ඒ ළමයා මගේ පන්තියේ ඉගෙන ගනිමින් සිටියා.

හය වසරට සමත්වීමෙන් පසුව මම දෙහිවල මධ්‍ය මහා විද්‍යාලයට ඇතුළු වුණා. ඇය ඒ බාලිකා විද්‍යාලයේම නතර වුණා. ඒත් ඇගේ මුහුණ මගේ සිතෙන් මැකී ගියේ නැහැ.

ඇගේ නිවස පිහිටියේත් අපේ ගෙදර කිට්ටුවමයි. ඇය තරුණ වියට පත්වන විට ඇගේ ඇසුර මා බලාපොරොත්තු වුණා. ඒත් ඈ මගේ මුහුණවත් බැලුවේ නැහැ. මුහුණට මුහුණ මුණ ගැහුනත් ඇය පාරේ අනික් පැත්තට මාරු වෙනවා.

මට ඉවසුම් නැතුව ගියාම ඇගේ මිතුරියකට මගේ අදහස කියා සිටියා. ඊට පසුව මිතුරිය කියා සිටියා ඇය මට අකමැතියි කියලා. ඇයත් කොටුවේ රැකියාවකට ආවා. එක දවසක් මම බස් එකේ වාඩිවෙලා එනකොට ඇය හිටගෙන හිටියා. මම ඇයට මගේ ආසනය පිරිනැමුවා.

ඊට පසුවදාම අර මිතුරිය ආවා මාව හමුවෙන්න. මොකක්ද දන්නවාද ආරංචිය. ඇය මට කැමැතිලු.

අපට දුවෙක් සහ පුතෙක් සිටිනවා. පුතා දමිත සඳුන් විජේසිරි. දුව මහේෂිකා මාපා. දෙදෙනාම විවාහකයි.

ඔබට තවත් දරුවන් පිරිසක් සිටිනවා කියලයි මා විශ්වාස කරන්නේ. ඒ තමයි ඔබ ලියා පළකළ පොත්පත්?

ඔව්, ‘පූජිත පාද’,’ මගේ නගරය’, ‘හිරු නොදුටු නර්තනය’ කෙටි කතා තුනක්.

‘සුපිෂ්පික වන අරණක හොඳ පදවැල්’ පද්‍ය සංග්‍රහයක් මා ජාතියට දායාද කර තිබෙනවා.

 

සටහන හා ඡායාරූප - අමරදාස සිල්වා

Make a Comment
Make a Comment

  Related News